Tjuojgos la värálda guhkemus tjuojgos 22 mijla guhka láhttujnis Burgávre, Huhttána ja Jåhkåmåhke gaskan.
Dåbdos histårjåjn 1884 jage rájes la aj akta åvdemus tjuojggusijs väráldin organiseridum hámen.
Láhtto l vargga sämmilágásj gå 1884 jagásj láhtto ja manná unna Juleväno jávrij milta álgujn Burgávren. Dan maŋŋela tjuojggá bájkoj 104 km Huhttánij moattotjit ja tjuojggat bátsidis 116 km Jåhkåmåhkkåj. Ålles mälggudahka le 220 km.
Mälggudagá milta gávnnuji 25 jugos- ja biebbmosaje vattátjit oassálasstijda dárbulasj fámov ja juhkusav.
Tjuojggusa histårjjå
Polárraåtsådiddje Adolf Erik Nordenskiölda nuppát Ruodnáednamekspedisjåvnån 1883 guoradalájga guokta oassevállde, goappátja sáme Jåhkåmåhkedáfos, jiegŋakontinenta sisŋgep amás guovlojt. Duordda ja Rassa moattojga bájkoj 57 tijma duogen viehka vájbbasa. Gå diededijga lijga tjuojggam ålles 460 kilomehtera de Nordenskiölda sälldát ávvusij.
Máhttesmin de ittjij aktak jáhke majt lijga tjuojggam. Aneduváj máhtodibmen tjuojggat dav mälggudagáv nåv oanes ájgen. Duodastittjat dav de Nordenskiölda 1884 diededij tjuojggusav, Jåhkåmåhkes- Huhttánij máhttse, mälggudahka mij lij ålles 22 mijla.
Tjuojgos lij vuoratjismáno goalmát ja nälját biejve gaskan 1884, kloahkka 18.00 lågenangáktsa tjuojgge tjuojggajin. Tjuojggin idja biejve, váni oadek, ja káfas ja konjakas fámov oadtjun.
Duorda Bávva ”Báv-Lássi” vuojtij. Tjuojgaj 21 tijman ja 22 minuvtan. Sieldes buorre tjuojgos nievres dálke, nievres russtigij hárráj ja gå tjuojgge hähttujin ietja láhttov dahkat guoktalåkguokta mijla. Sábegij ma lidjin 210-300 sm guhke ja 8-12 sm gåbde ja dieddin bájkoj gålmmågierde ienebut gå dálásj gilpossabega.
Tjuojggusa maŋŋela ärroduvvin diedon Duorda Bávva Lássi ja ietjá tjuojgge gudi tjuojggusav tjadádin, stuorra tjuojggemielunin buorredagos. Valástallamhistårjå låsemus ja garrasamos gilbos lij.
